Os socialistas levarán ao pleno unha moción para reclamar a convocatoria da Mesa da Mobilidade, o informe de seguimento do plan e a tramitación da nova Ordenanza de Mobilidade Sostible
O Grupo Municipal Socialista de Arteixo presentará no pleno deste mes unha nova moción para reclamar ao Goberno local do Partido Popular a execución e avaliación urxente do Plan de Mobilidade Urbana Sostible (PMUS) 2020-2028.
A formación socialista, liderada por Martín Seco, denuncia que, cando están a piques de cumprirse seis dos oito anos de vixencia do documento, o Executivo de Carlos Calvelo non tería aplicado os mecanismos de seguimento previstos no propio plan e mantería pendente a aprobación de normas consideradas fundamentais para a mobilidade e a seguridade viaria do municipio.
Desde o PSOE lembran que o PMUS constitúe un instrumento estratéxico para a planificación da mobilidade urbana e sinalan que a súa correcta execución e seguimento son tamén relevantes para a captación de financiamento europeo. Os socialistas consideran que, no caso de Arteixo, o documento corre o risco de quedar reducido, segundo denuncian, a un trámite administrativo sen desenvolvemento efectivo.
Unha Mesa da Mobilidade que non se reuniu desde a aprobación do plan
Un dos principais puntos de crítica do PSOE céntrase na participación cidadá. Segundo os socialistas, o PMUS contemplaba a creación dunha Mesa da Mobilidade na que estarían representados os grupos políticos municipais, persoal técnico, empresas de transporte, comerciantes, sector educativo e veciñanza.
O documento establecía, segundo a formación socialista, reunións con carácter semestral. Porén, Martín Seco asegura que este órgano non foi convocado desde a aprobación do plan.
“Despois de seis anos de PMUS, o alcalde non se dignou a convocar nin unha soa vez a Mesa da Mobilidade”, afirma o voceiro socialista, que acusa o Goberno local de actuar “ás costas da veciñanza” e de non ofrecer información sobre o nivel de cumprimento dos obxectivos previstos.
A Ordenanza de Mobilidade, pendente
Outro dos aspectos sinalados polo PSOE é a falta dunha nova Ordenanza de Mobilidade Sostible. Segundo os socialistas, o PMUS incluía entre as súas actuacións a medio prazo, para o período 2022-2024, a redacción e aprobación desta normativa.
A ordenanza debería establecer, entre outras cuestións, o marco de convivencia entre vehículos, peóns, bicicletas e vehículos de mobilidade persoal (VMP), así como aspectos relacionados co estacionamento, o servizo de taxi, o alugueiro de bicicletas e a calidade do aire.
“Estamos no final de 2026, o prazo marcado no PMUS caducou hai dous anos e Arteixo segue sen ordenanza”, sinala Seco. Na súa opinión, esta situación deixa o municipio sen unha regulación adaptada á aparición de novas formas de mobilidade.
O voceiro socialista acusa ademais o PP de ter utilizado o PMUS para proxectar unha imaxe de sustentabilidade e facilitar a captación de fondos europeos, sen que posteriormente se producise, segundo a súa denuncia, o desenvolvemento previsto no documento.
O PSOE reclama transparencia e participación
A moción que os socialistas levarán ao pleno formula dous bloques de actuacións. Por unha banda, solicita a convocatoria inmediata da Mesa da Mobilidade prevista no PMUS, coa participación dos diferentes sectores sociais e económicos, así como a presentación do Informe de Seguimento oficial que permita coñecer o grao real de execución das medidas contempladas no plan.
Por outra banda, a iniciativa reclama iniciar a exposición pública da nova Ordenanza de Mobilidade Sostible, cuxa tramitación debería terse completado, segundo o calendario recollido no propio PMUS, no ano 2024.
“Esiximos transparencia, que dean conta do grao de execución do plan e que abran xa a participación pública para regular a mobilidade real de Arteixo”, conclúe Martín Seco.
