O paso do río na praia de Seiruga/Esteiro, dentro da primeira etapa do coñecido Camiño dos Faros, volve xerar preocupación entre sendeiristas e veciñanza debido aos riscos que presenta durante a marea alta e os episodios de forte marexada.
Segundo alertan persoas coñecedoras habituais da ruta, o cauce pode chegar a ter unha profundidade “ata o peito” cando sobe a marea, convertendo o cruzamento nun punto especialmente perigoso. Ademais, nos días de temporal marítimo ou forte oleaxe, as correntes poden arrastrar con facilidade a quen intente atravesalo.
A única alternativa segura identificada actualmente sería desviarse pola estrada entre Beo e Seiruga, utilizando a ponte existente na zona para evitar o paso directo polo río.
Unha ruta sen promotora oficial
O debate sobre a seguridade volve tamén poñer enriba da mesa a complexa situación organizativa do Camiño dos Faros. Aínda que nos últimos anos se celebraron diferentes andainas e actividades sendeiristas, estas foron promovidas por asociacións culturais ou concellos de maneira puntual, pero sen unha entidade promotora oficial da ruta.
Un dos exemplos máis recentes foi unha andaina organizada por unha entidade de Boiro co apoio do Concello de Rianxo, unha colaboración considerada pouco habitual pero que reflicte a realidade actual do proxecto.
Fontes vinculadas á orixe do camiño lembran que as persoas que impulsaron inicialmente a ruta “xa non continúan” e que, no seu día, defendían un modelo afastado do negocio turístico. Porén, actualmente a marca “Camiño dos Faros” estaría rexistrada a nome de dúas persoas vinculadas ás zonas de Ponteceso/Vimianzo e Pontevedra, mentres distintas axencias de viaxes e establecementos hoteleiros operan arredor do itinerario.
O conflito polos terreos privados
Outro dos elementos que marcou a evolución do proxecto foi o paso do percorrido por numerosas leiras privadas. Durante anos, distintos concellos chegaron incluso a destinar partidas públicas para a limpeza e mantemento de camiños que non eran de titularidade municipal.
Precisamente esta situación, unida aos intereses xerados arredor do percorrido, tería motivado a creación do Camiño do Litoral por parte da Xunta de Galicia, co obxectivo de dispoñer dun itinerario oficial alternativo e reducir as disputas xurdidas en torno ao Camiño dos Faros.
Mentres tanto, sendeiristas e colectivos locais insisten na necesidade de mellorar a sinalización e advertir claramente dos riscos existentes en determinados puntos do percorrido, especialmente en épocas de mareas vivas e temporal marítimo.
