A celebración da festa dos Maiores no concello de Malpica de Bergantiños vén de xerar unha forte polémica entre a veciñanza, despois de que se fixese público que as persoas asistentes tiveron que pagar 20 euros por participar no evento. A controversia aumentou ao compararse co concello limítrofe de Ponteceso, onde a mesma celebración foi completamente gratuíta.
Segundo diversas queixas recollidas entre os asistentes, moitos maiores consideran inxusto ter que asumir este custo, especialmente tendo en conta que se trata dunha actividade dirixida a un colectivo que, en moitos casos, conta con pensións reducidas. “Non é polo diñeiro en si, é pola diferenza de trato”, sinala unha veciña, quen asegura que cada vez hai máis desigualdades entre concellos próximos.
