Un incendio rexistrado esta madrugada na Coruña obrigou a desaloxar un edificio da rúa Nicomendes-Pastor Díaz e deixou once persoas atendidas, das cales nove tiveron que ser trasladadas ao Complexo Hospitalario Universitario da Coruña (CHUAC).
Segundo informou o 112 Galicia, o incendio declarouse arredor das 03:00 horas. O lume afectou a dúas habitacións situadas no primeiro andar do inmoble, debido á combustión dun patinete eléctrico.
A presenza de fume e as lapas obrigaron a desaloxar o edificio como medida de seguridade. Os servizos de emerxencias desprazáronse ata o lugar para controlar o incendio e atender as persoas afectadas.
En total, once persoas recibiron asistencia, mentres que nove delas precisaron ser evacuadas ao CHUAC para recibir atención médica.