Cinco familias aseguran levar anos agardando por unha solución e reclaman ao Concello de Camariñas unha resposta ás súas peticións
Veciños do lugar de A Grixa, en Ponte do Porto (Camariñas), expresan o seu malestar pola situación dos accesos a varias vivendas da zona, unha problemática que, segundo sinalan, leva anos pendente de solución.
En total, serían cinco familias afectadas, entre as que hai nenos, persoas maiores e dúas persoas con problemas de mobilidade, o que fai especialmente preocupante, segundo os residentes, a situación actual dos accesos ás súas casas.
Os afectados aseguran que a mellora dos accesos foi prometida aparentemente hai varios anos, pero, ata o momento, non se tería materializado ningunha solución definitiva.
Unha das persoas afectadas explica que xa realizou reclamacións de maneira presencial no seu día e que posteriormente tamén trasladou a situación por outras vías, sen recibir, segundo afirma, ningún acuse de recibo nin resposta ás súas peticións.
A preocupación continúa. O pasado 1 de setembro, a veciña asegura que enviou unha mensaxe por WhatsApp á alcaldesa de Camariñas, á que acompañou cun vídeo no que se mostra a situación, ademais de presentar unha nova reclamación por outra vía. Segundo denuncia, ata a data non recibiu resposta.
“Somos 5 familias afectadas, con niños, personas mayores y dos personas con problemas de movilidad”, sinala a veciña, que reclama unha solución e unha resposta por parte da Administración.
Ante esta situación, os afectados aseguran que agardarán ata o 15 de setembro para obter algunha resposta. De non producirse, anuncian que estudarán facer pública a súa situación a través dos medios de comunicación e achegar fotografías e vídeos que permitan comprobar directamente as condicións dos accesos.
Os veciños consideran que o problema non debería prolongarse máis tempo e reclaman que se lles informe sobre as actuacións previstas, os prazos e o compromiso real para solucionar definitivamente os accesos ás vivendas.
A situación de A Grixa súmase así ás reclamacións veciñais relacionadas co estado e mantemento de determinados accesos e infraestruturas en distintos puntos do municipio de Camariñas.
Os afectados confían en que, antes de ter que recorrer á denuncia pública, o Concello dea resposta ás reclamacións presentadas e concrete unha solución para estas cinco familias.
