Os veciños da zona de As Calzadas, no concello da Laracha, amosan o seu fondo malestar polo estado no que se atopan as marxes das estradas e os montes da contorna. Segundo denuncian, tras varias queixas presentadas ao Concello da Laracha e despois de que a situación fose difundida nas redes sociais e recollida polo xornal Faro da Costa, hoxe desprazáronse dous tractores á zona.
Con todo, os residentes aseguran que os traballos realizados foron insuficientes. Afirman que, en lugar de efectuar unha limpeza adecuada, limitáronse a esmagar a herba en varios puntos, sen realizar unha roza efectiva. «A diferenza nótase cando un traballo se fai con interese e cando se fai simplemente para cumprir», sinalan.
Os afectados consideran que existe un trato desigual entre as distintas parroquias do municipio. Poñen como exemplo a zona de Castro de Montes Claros, onde proximamente se celebrará unha festa, e San Román, preto da vivenda do alcalde, lugares nos que, segundo indican, as tarefas de mantemento se realizan de maneira exemplar.
Ademais, denuncian que numerosos montes pertencentes a grandes propietarios levan anos sen limpar, incrementando o risco de incendios, mentres que aos pequenos propietarios si se lles esixe cumprir coa normativa mediante requirimentos e posibles sancións. «Non é xusto que a uns se lles reclame limpar as leiras e a outros se lles permita manter os montes abandonados sen consecuencias», critican.
Os veciños reclaman ao Concello da Laracha que actúe con igualdade para todos os propietarios, sen excepcións, e que garanta a limpeza e o mantemento das zonas rurais para mellorar a seguridade e reducir o risco de incendios durante o verán.