Laxe. O mal estado de varias beirarrúas da vila volve situarse no centro das críticas veciñais despois de que, hai dous días, un home sufrise unha grave caída ao tropezar cunha plaqueta levantada nunha beirarrúa pública situada no centro de Laxe. Como consecuencia do accidente, a vítima rompeu a cadeira e tivo que recibir asistencia médica.
Segundo denuncian varios veciños, o pavimento onde ocorreu o sinistro levaba arredor de catro meses deteriorado sen que se realizasen os traballos de reparación. Aseguran, ademais, que non se trata dun caso illado, xa que existen numerosas beirarrúas en mal estado, entre elas varios treitos da contorna da praza de Ramón Juega e outras zonas da localidade, onde o paso do tempo e a falta de mantemento provocaron un evidente deterioro.
Os residentes lembran tamén o accidente ocorrido o pasado ano nas pasarelas de Soesto, no que un veciño de Ourense, Juan, resultou ferido, e consideran que estes sucesos poñen de manifesto a necesidade dun maior control e mantemento das infraestruturas públicas para evitar novos incidentes.
Entre os veciños hai críticas cara ao funcionamento do servizo municipal encargado das obras e do mantemento viario. Consideran que debería existir unha supervisión máis frecuente para detectar e reparar con rapidez os desperfectos antes de que provoquen accidentes.
Os afectados reclaman ao Concello de Laxe unha actuación urxente para reparar as zonas máis deterioradas e establecer un plan de conservación das beirarrúas que garanta a seguridade dos peóns. Ao mesmo tempo, piden que se asuman responsabilidades e que se priorice a prevención para evitar que situacións similares volvan repetirse.
