Os veciños da parroquia de Pastoriza manifestan a súa preocupación polo que consideran unha situación de abandono por parte do Concello de Arteixo, denunciando a falta de mantemento en distintos espazos públicos.
Un dos casos que máis inquietude está a xerar é o estado da contorna da pista de chave de Pastoriza, onde a maleza medra sen control e o monte permanece sen desbrozar. Esta situación resulta especialmente preocupante en plena vaga de calor, cando o risco de incendio aumenta considerablemente.
Os residentes alertan de que a acumulación de vexetación seca supón un perigo tanto para as instalacións deportivas como para as vivendas próximas, reclamando unha actuación urxente por parte da administración local para evitar posibles incidentes.
«Pastoriza está abandonada», aseguran os veciños, que solicitan ao Concello de Arteixo que leve a cabo os traballos de limpeza e desbroce necesarios para garantir a seguridade da veciñanza e o correcto mantemento dos espazos públicos.
Os afectados agardan que as súas demandas sexan atendidas canto antes e que se adopten medidas para evitar que esta situación continúe agravándose.
