Un home duns sesenta anos foi localizado este luns sen vida no mar, despois de que se activase un dispositivo de busca tras comunicarse a súa desaparición na zona do Faro de Mera, en Serantes, no concello de Oleiros.
O 112 Galicia tivo coñecemento da desaparición arredor de dez minutos despois da medianoite, tras recibir o aviso dun particular, que alertaba de que o home saíra cara á zona do Faro de Mera e non regresara.
De inmediato, os xestores do 112 Galicia mobilizaron os medios de emerxencia e comunicaron a situación a Salvamento Marítimo, ao Servizo de Gardacostas de Galicia, á Garda Civil, á Policía Local e aos servizos de Emerxencias de Oleiros.
O dispositivo de procura mantívose durante a xornada de onte, aínda que rematou sen resultados positivos. Esta mañá, os labores de busca retomáronse e Salvamento Marítimo informou finalmente da localización do home, que foi atopado flotando no mar e xa falecido.
As circunstancias nas que se produciu o falecemento están pendentes de esclarecer.
