O vindeiro 14 de maio, o GALP Costa da Morte celebrará no Edificio Fórum Carballo a xornada “Medrando polo Mar”, un encontro centrado na innovación, o emprendemento e as novas oportunidades vinculadas ao sector marítimo e costeiro da Costa da Morte.
A cita dará comezo ás 16:45 horas e reunirá profesionais, persoas emprendedoras, entidades e axentes vinculados ao mar para compartir experiencias, ideas e proxectos que contribúan ao desenvolvemento sostible do territorio.
Durante a xornada abordaranse cuestións relacionadas coa economía azul, a creación de novas iniciativas empresariais e o aproveitamento dos recursos mariños e costeiros como motor de crecemento económico e social na comarca.
Desde o GALP Costa da Morte destacan a importancia de impulsar espazos de encontro e reflexión que permitan “seguir medrando polo mar”, favorecendo a colaboración entre o tecido empresarial, o sector pesqueiro e a mocidade emprendedora.
O evento está aberto á participación das persoas interesadas en coñecer novas oportunidades profesionais e empresariais arredor do mar e da economía costeira.
