A Xunta de Galicia publicou esta semana no Diario Oficial de Galicia (DOG nº 82, do 5 de maio de 2026) a relación individual de bens, dereitos e propietarios afectados polo proxecto de construción de sendas alternativas nos tramos de estrada polos que transcorre o Camiño Fisterra-Muxía, correspondente á clave 2025/016.
O proxecto contempla a creación de novos itinerarios peonís co obxectivo de mellorar a seguridade dos peregrinos e veciños, reducindo o tránsito por determinados tramos viarios e favorecendo unha circulación máis cómoda e sostible. As actuacións previstas desenvolveranse no termo municipal de Dumbría, un dos concellos polos que discorre esta histórica prolongación xacobea cara á Costa da Morte.
Segundo recolle a publicación oficial, o trámite inclúe a exposición pública da relación de parcelas e propiedades afectadas pola execución das obras, permitindo ás persoas titulares presentar alegacións ou achegar documentación no prazo establecido.
Desde o Concello de Dumbría valoran positivamente unha actuación que contribuirá a reforzar a seguridade viaria e a experiencia dos milleiros de peregrinos que cada ano percorren o itinerario cara a Fisterra e Muxía, dous dos destinos máis simbólicos do Camiño de Santiago.
A iniciativa enmárcase dentro das actuacións de mellora das infraestruturas vinculadas ás rutas xacobeas impulsadas pola administración autonómica, co fin de preservar o valor patrimonial e turístico do Camiño e adaptar os seus percorridos ás necesidades actuais de mobilidade e seguridade.
