O asfalto mollado obriga a extremar as precaucións mentres se suceden varios sinistros en Oroso, Santiago e Cabanas
A choiva está a marcar esta mañá a circulación nas estradas da provincia da Coruña, onde se rexistraron catro accidentes de tráfico en poucas horas. Os sinistros producíronse en distintos puntos de Oroso, Santiago, Conxo e Cabanas.
O primeiro dos accidentes tivo lugar ás 8.29 horas en Oroso, concretamente na rúa Estación, situada baixo a AP-9. Segundo informou o 112 Galicia, unha furgoneta saíuse da vía e acabou envorcando.
Apenas quince minutos despois, ás 8.44 horas, produciuse un segundo sinistro na rúa de Murcia, na zona de A Infesta, en Santiago de Compostela. Neste caso, tratouse dunha colisión entre un turismo e un tractor.
O terceiro accidente rexistrouse ás 9.09 horas na SC-20, á altura do quilómetro 10, en Conxo. Un turismo saíuse da estrada e acabou envorcado fóra da calzada.
O cuarto incidente tivo lugar en Cabanas, onde un camión envorcou na rotonda de acceso á autopista e parte da súa carga quedou esparexida pola vía, provocando dificultades na circulación.
A sucesión de accidentes prodúcese nunha mañá marcada pola choiva, polo que se recomenda extremar a precaución ao volante, reducir a velocidade e aumentar a distancia de seguridade.
⚠️ Ollo coa choiva e co asfalto mollado. Precaución, amigo condutor.