A formación asegura que as deficiencias xa foran denunciadas en 2022 e levadas ao Pleno en 2024 e reclama novas inspeccións e medidas para garantir o cumprimento da normativa
Arteixo. Alternativa Enxebre de Arteixo denuncia novamente a situación da explotación porcina da Ermida, en Lañas, que, segundo asegura a formación, continúa presentando deficiencias que afectan á veciñanza da zona.
A organización lembra que o problema non é novo e que xa no ano 2022 a súa concelleira Noelia Martínez Canosa, xunto con integrantes da formación e persoas residentes na contorna, denunciara publicamente o estado das instalacións. Naquel momento reclamáronse actuacións e solucións ante diversas deficiencias e, tras as denuncias, realizáronse algunhas actuacións e o propietario comprometeuse a presentar un proxecto e executar melloras.
Porén, Alternativa Enxebre considera que aquelas medidas non resolveron o problema de fondo. A situación da explotación volveu ser trasladada ao Pleno do Concello de Arteixo no ano 2024 e, segundo a formación, en 2026 continúan rexistrándose problemas similares.
Nos últimos meses, representantes de Alternativa Enxebre mantiveron contactos con veciños afectados e tamén co propietario das instalacións. A formación explica que chegou a reunirse con el e con residentes da zona a pé da explotación para amosarlle directamente as deficiencias detectadas, entre elas a acumulación de puríns, o estado da balsa de seguridade, problemas de limpeza e mantemento, o deterioro de cerramentos e tabiques, o estado do valado e do acceso ao pozo de puríns, así como os fortes cheiros e a presenza de insectos.
Segundo a organización, tras esa reunión procedeuse ao baleirado e limpeza da balsa de seguridade, actuación que Alternativa Enxebre recoñece, pero tamén se adquiriron novos compromisos para limpar e acondicionar as instalacións e corrixir as deficiencias existentes.
A formación asegura que unha nova visita realizada recentemente, tras recibir vídeos e queixas de residentes da zona, permitiu comprobar que parte deses compromisos non se terían materializado. Os seus representantes sinalan a existencia de acumulacións de purín no exterior das instalacións e describen un estado de deterioro en diferentes elementos da explotación, con formigón degradado, fendas e aberturas nos cerramentos, tabiques deteriorados e zonas da cuberta afundidas ou con placas en mal estado.
Alternativa Enxebre tamén alerta dos fortes cheiros e da presenza de insectos que, segundo afirma, están afectando á calidade de vida das persoas residentes nas proximidades.
Reclaman explicacións ao Concello
A formación considera que tamén debe analizarse a actuación do Concello de Arteixo, ao entender que a administración local coñece desde hai anos as denuncias existentes sobre esta explotación.
“Onde están as inspeccións? Que seguimento se fixo das medidas esixidas? Que se comprobou desde entón? E por que chegamos novamente a esta situación?”, pregunta Alternativa Enxebre.
A organización asegura que non reclama ningún trato de favor para a explotación, senón que se inspeccione o cumprimento da normativa e se adopten as medidas correspondentes no caso de detectarse incumprimentos.
“Non queremos tratos de favor para ninguén. Queremos que se inspeccione, que se comprobe o cumprimento da normativa e que se actúe coa mesma esixencia que se lle aplicaría a calquera outro veciño ou empresa”, sinala a formación.
Alternativa Enxebre defende que unha explotación porcina pode desenvolver a súa actividade, pero debe facelo cumprindo a normativa ambiental, sanitaria, gandeira e de seguridade que lle sexa aplicable e evitando que as deficiencias das instalacións repercutan sobre a veciñanza.
Novas denuncias
Tras os contactos mantidos co propietario e o prazo concedido para acometer melloras, Alternativa Enxebre anuncia que presentará novas denuncias ante as administracións competentes e que estudará outras medidas administrativas e legais para intentar conseguir unha solución definitiva.
A formación afirma que tentou inicialmente abordar a situación mediante o diálogo, pero considera que debe actuar ante a persistencia dos problemas.
“Hai un límite, e ese límite é o dereito dos veciños e veciñas a vivir dignamente nas súas propias casas”, sinala.
Alternativa Enxebre conclúe reivindicando o dereito das persoas residentes na Ermida e en Lañas a abrir as ventás, utilizar os seus xardíns e vivir nas súas casas sen ter que soportar os problemas derivados, segundo denuncia, da situación actual da explotación porcina.
