O PSdeG-PSOE de Corcubión reclama ao Concello que actúe ante o novo resultado positivo por E. coli rexistrado na praia de Quenxe. Segundo os datos da última analítica, correspondente á mostra tomada o pasado 12 de agosto, detectouse unha concentración de 1.652 NMP/100 ml.
Desde o PSdeG sinalan que este episodio non pode considerarse un feito illado. Durante o mes de xullo xa se rexistrara outro resultado positivo por E. coli, que estaría relacionado cun fallo nunha estación de bombeo próxima. Ademais, o 20 de xullo detectáronse tamén enterococos intestinais nas augas da praia.
Ante a reiteración destes episodios, os socialistas consideran necesario aclarar a súa orixe e adoptar medidas que eviten novas incidencias. Para iso, reclaman que o Concello, en colaboración con Augas de Corcubión e Cee, investigue as posibles causas, revise o funcionamento da rede de saneamento e comprobe o estado das instalacións relacionadas coa evacuación das augas residuais.
O PSdeG considera que a sucesión de resultados desfavorables en poucas semanas require unha resposta clara das administracións responsables e medidas preventivas eficaces para garantir a calidade das augas e a seguridade das persoas usuarias da praia.
“Tres episodios en poucas semanas esixen explicacións e solucións. Quenxe non pode quedar á espera da seguinte analítica”, sinalan desde o PSdeG-PSOE de Corcubión.
Os socialistas instan así ás administracións implicadas a actuar con rapidez e a informar á veciñanza sobre as causas dos episodios de contaminación e sobre as medidas que se vaian adoptar para evitar que volvan repetirse.