Arteixo, 18 de xuño de 2026. Alternativa Enxebre denunciou este mércores a decisión do Goberno municipal de Arteixo de trasladar o Pleno ordinario de xuño ao día 30, unha data na que a súa única representante no Concello, Noelia Martínez Canosa, xa advertira con anterioridade que non podería asistir por compromisos persoais adquiridos con moita antelación.
Segundo explicou a formación, a comezos deste mes o Executivo local comunicou aos grupos municipais a súa intención de modificar a data do Pleno ordinario, inicialmente previsto para o 25 de xuño, último xoves do mes segundo establece o Regulamento Orgánico Municipal. A razón alegada foi a coincidencia coa festividade de San Xoán, celebrada o día anterior.
A portavoz de Alternativa Enxebre asegura que desde o primeiro momento mostrou disposición a aceptar un cambio de data, sempre que se realizase por consenso e garantindo a participación de todos os representantes municipais. Nese contexto, trasladou ao Goberno local os únicos días nos que lle resultaba imposible asistir debido a compromisos previamente adquiridos: o 29 e 30 de xuño e o 1, 2, 3 e 6 de xullo.
Porén, segundo denuncia a formación, o alcalde, Carlos Calvelo, acabou fixando a sesión plenaria precisamente para o 30 de xuño, unha das datas comunicadas como incompatibles pola concelleira.
“Aquí non estamos a falar dun imprevisto nin dunha circunstancia sobrevida. Existían alternativas e existía a posibilidade de manter a data ordinaria ou buscar outra compatible coa asistencia de todos os representantes municipais”, sinalou Martínez Canosa, quen considera que a decisión resulta “especialmente grave”.
Desde Alternativa Enxebre sosteñen que este episodio non é un feito illado, senón que forma parte dunha dinámica de cambios frecuentes en plenos, comisións informativas, xuntas de portavoces e outras reunións municipais que, segundo afirman, dificultan a organización dos membros da oposición.
A concelleira lembrou que os representantes da oposición deben compatibilizar a súa actividade institucional coa súa vida laboral e familiar, o que implica modificar quendas de traballo e reorganizar horarios para poder asistir ás convocatorias municipais.
A formación considera que a ausencia da súa representante no Pleno suporía deixar sen voz a Alternativa Enxebre na principal sesión de control e fiscalización do Goberno local, ao tratarse da única concelleira coa que conta o grupo na corporación.
Neste sentido, Martínez Canosa cualificou a situación como un “atentado contra a democracia e contra o dereito de participación política”, ao entender que se está impedindo o exercicio efectivo da representación que lle foi outorgada pola cidadanía.
Alternativa Enxebre vincula ademais esta decisión coa actividade de control e denuncia que vén desenvolvendo nos últimos meses fronte á xestión do Executivo municipal. “A democracia non consiste en utilizar unha maioría absoluta para dificultar a presenza da oposición nos plenos, senón en garantir que todas as voces poidan exercer plenamente a representación que lles corresponde”, afirmou a edil.
Finalmente, a formación advertiu de que, se non se rectifica a convocatoria e non se escolle unha data que permita a asistencia de todos os representantes municipais, estudará a adopción de medidas políticas, institucionais e legais para defender os seus dereitos de representación e denunciar o que considera unha actuación contraria aos principios básicos da participación democrática.