O Autocross de Santa Comba celebrado esta fin de semana deixou un importante malestar entre parte dos pilotos e equipos polo estado no que se atopaba o circuíto. As condicións dalgunhas zonas do trazado provocaron numerosas queixas entre os participantes.
O comentario máis repetido durante a xornada foi que era moi fácil romper, precisamente por esas zonas do trazado. Unha situación especialmente preocupante nunha proba do Campionato Galego, onde cada avaría supón un importante desembolso económico para os equipos.
E todo isto sucede dous anos despois de que o Concello presentase a recuperación do Autocross como un dos logros deportivos do municipio.
En 2024, o alcalde Alberto Romar participou na presentación do 34º Autocross xunto coa concelleira de Deportes, o técnico municipal e o presidente de SC Motorsport, Iván Couto. A recuperación da proba foi presentada daquela como froito da colaboración entre o novo equipo e o Concello.
Agora, dous anos despois, a pregunta é evidente: que se fixo realmente para poñer o circuíto a punto?
Porque recuperar o Autocross non debería consistir unicamente en conseguir que a proba volva ao calendario. Tamén implica manter o trazado en condicións adecuadas, especialmente cando falamos dunha competición oficial na que participan vehículos sometidos a grandes esixencias.
Un circuíto que non parece estar “a punto”
O alcalde aseguraba en anteriores declaracións o compromiso municipal coa recuperación da competición. Por iso resulta difícil non comparar aquelas palabras coa realidade que atoparon os pilotos esta fin de semana.
O estado dalgunhas zonas do circuíto foi cualificado por participantes como “tercermundista”, especialmente polos problemas existentes nas zonas de transición entre terra e asfalto.
Se esas condicións podían incrementar o risco de avarías, a cuestión xa non é simplemente estética. Estamos falando de diñeiro que os equipos poden ter que gastar en reparacións por unhas condicións do trazado que deberían estar previamente revisadas e acondicionadas.
A falta de auga tampouco axudou
Á situación do circuíto sumouse o problema da falta de auga. A organización xa comunicara que, debido á situación hídrica, non habería punto de lavado a presión e que o rego do trazado se realizaría mediante medios agrícolas.
A falta de auga engadiu dificultades a unha proba que xa estaba condicionada polo estado dalgunhas zonas do circuíto.
Ante esta situación, tamén cabe preguntarse se non existía a posibilidade de aprazar a proba quince días, buscando unhas condicións máis adecuadas para pilotos, equipos e organización.
E que papel ten o Concello?
O Concello de Santa Comba destacou en 2024 a recuperación do Autocross e o incremento das axudas municipais ás asociacións deportivas.
Por iso sería interesante coñecer os datos:
Canto diñeiro destinou o Concello ao Autocross desde 2024?
Que obras ou actuacións de mellora se realizaron no circuíto?
Canto custaron?
Que subvencións recibiu a entidade organizadora?
E canto se destinou especificamente ao acondicionamento do trazado?
Porque, se existe investimento público detrás da recuperación do Autocross, os afeccionados e os equipos teñen dereito a coñecer onde se empregou.
A presenza do Concello durante a proba non debería limitarse a que o seu logotipo apareza nas pulseiras de acceso.
A Federación tamén ten que dar explicacións
A Federación Galega de Automobilismo tamén debería explicar que controis se realizaron sobre o estado do circuíto antes da celebración da proba e que condicións debe cumprir o trazado para acoller unha competición do Campionato Galego.
Se varios participantes consideran que determinadas zonas podían provocar avarías, esa cuestión merece cando menos unha explicación técnica.
Non se trata de culpar aos voluntarios nin aos traballadores do circuíto. Eles estiveron á altura, pendentes durante toda a xornada e intentando solucionar as dificultades que ían aparecendo.
A crítica debe dirixirse a quen ten capacidade para planificar, investir, acondicionar e supervisar.
Santa Comba recuperou o Autocross hai dous anos.
Agora toca demostrar que tamén quere coidalo e poñelo realmente á altura dunha proba do Campionato Galego.
