Veciñanza da rúa de Cimadevila denuncia problemas de presión e cortes de auga nas zonas altas do concello
BOIRO — A falta de auga e os problemas de presión están a xerar malestar entre veciños de Boiro, especialmente nas zonas altas do concello. Residentes da rúa de Cimadevila aseguran levar varios días con moi pouca presión a partir das 20:00 horas e denuncian que, nalgúns momentos, a auga chega a desaparecer por completo.
Unha das persoas afectadas explica que esta situación xa se prolonga desde hai días: «Hoxe estou sen auga, despois de días sen apenas presión a partir das 8 da tarde». Segundo relata, a noite anterior, ás 00:35 horas, tampouco dispoñía de subministración.
«Non é normal que, por un servizo que nos cobran, esteamos sen auga nas partes altas do concello», critica a veciña, que reclama explicacións e unha solución ao problema.
O malestar tamén se estende á xestión municipal. A afectada cuestiona o argumento de que non haxa recursos económicos para solucionar determinados problemas e compara esta situación con investimentos realizados polo Concello, entre eles o parque municipal ou as obras da Casa da Cultura, que considera «totalmente innecesarias».
Tamén fai referencia ao custo das obras e á situación económica municipal, reclamando que as prioridades do Concello teñan en conta servizos básicos como o abastecemento de auga.
«Eu teño a cultura de ir duchado e coa louza lavada para a cama», ironiza a veciña, que advirte de que, se o problema non se resolve, ten intención de promover para o próximo ano unha manifestación para reclamar cambios na xestión municipal.
Á falta de auga súmanse outras queixas veciñais, como as dificultades para aparcar debido á escaseza de prazas libres en determinadas zonas.
A situación está a incrementar o malestar entre parte da veciñanza, que reclama ao Concello información sobre as causas dos problemas de presión e abastecemento, así como medidas que garantan un servizo de auga estable, especialmente nas zonas máis altas do municipio.