A Asociación Cultural Mar de Fondo aclara que non organizará as festas patronais de Malpica e denuncia “trabas, promesas incumpridas e obstáculos” por parte do Concello
A Asociación Cultural Mar de Fondo fixo público un comunicado no que quere aclarar a súa posición ante as diferentes informacións e comentarios xurdidos nos últimos días arredor da organización das Festas do Mar de Malpica.
A entidade confirma que non organizará as Festas do Mar 2026 nin ningunha outra festa patronal e insiste en que “nunca foi nin é a Comisión de Festas”. Segundo explica, Mar de Fondo é unha asociación cultural que decidiu implicarse de maneira voluntaria na organización das celebracións co obxectivo de evitar que Malpica quedase sen festas cando non existía outra entidade que puidese asumir esa responsabilidade.
A asociación tamén quere deixar claro que nunca solicitou cotas, doazóns ou achegas económicas á veciñanza, aos comercios ou ás empresas para financiar as celebracións. Segundo Mar de Fondo, os proxectos realizados foron posibles grazas ao traballo, á xestión e aos recursos asumidos directamente pola propia entidade.
Un investimento asumido pola asociación
Mar de Fondo sinala que a contratación dos artistas, a infraestrutura, os seguros e o resto dos gastos derivados dos eventos organizados pola asociación, incluídas as festas patronais, foron asumidos integramente pola entidade tanto desde o punto de vista organizativo como económico.
A asociación considera importante poñer en valor o esforzo realizado durante todo este tempo polas persoas que participaron no proxecto e asegura que, sen ese traballo e investimento, os eventos “simplemente non se terían celebrado nas condicións nas que finalmente se realizaron”.
De cara ao futuro, Mar de Fondo anuncia que continuará centrando a súa actividade nos dous proxectos que considera propios da entidade: Pedra da Arca Fest, en Cerqueda, e Sisargas Fest, en Malpica. A intención, segundo explican, é seguir consolidando ambos os festivais e facelos medrar edición tras edición.
Críticas á actuación do Concello
A parte máis crítica do comunicado céntrase na relación mantida co Concello de Malpica. A asociación asegura que a colaboración municipal recibida foi “practicamente inexistente” e matiza que esta falta de apoio procedeu “por parte dalgunhas persoas, non de todas”.
Segundo Mar de Fondo, durante este tempo atopáronse con “trabas, promesas incumpridas e continuos obstáculos” para desenvolver actividades culturais. A entidade considera especialmente difícil de comprender que iniciativas impulsadas de maneira altruísta atopasen, ao seu xuízo, “máis impedimentos ca facilidades” por parte da Administración local.
A asociación subliña, con todo, que non pretende entrar en debates políticos nin xerar confrontación pública e que o seu obxectivo foi sempre contribuír á vida cultural, social e económica de Malpica.
A proposta para as Festas do Mar 2026
Respecto ás Festas do Mar 2026, Mar de Fondo asegura que intentou ata o último momento que puidesen celebrarse, a pesar das dificultades existentes.
Co obxectivo de facilitar a organización, a asociación afirma que puxo á disposición do Concello boa parte da infraestrutura, contratacións e artistas que xa tiña reservados para esas datas.
Segundo relata Mar de Fondo, posteriormente tivo coñecemento de que se estaba a traballar na organización dunha serie de eventos “sen a nosa información nin aviso previo”, polo que a asociación non participou neles. Finalmente, explica, a proposta foi rexeitada ao considerar que non existía tempo suficiente para asumir a celebración.
“Sempre estaremos dispostos a colaborar”
A pesar desta situación, Mar de Fondo asegura que mantén a mesma postura que desde o inicio: se no futuro o Concello ou calquera outro colectivo decide asumir a organización das festas patronais, a asociación estará disposta a colaborar e facilitar a transición.
A entidade insiste en que o seu único interese é que Malpica “siga tendo as celebracións que merece”.
No tramo final do comunicado, Mar de Fondo agradece o apoio recibido por parte das persoas que confiaron no seu traballo e apoiaron o proxecto durante estes anos.
A asociación anuncia así unha nova etapa centrada nos seus propios proxectos culturais e desexa “toda a sorte do mundo” ás persoas que asuman a organización das próximas Festas de Malpica.