Os nacionalistas denuncian o “estado desastroso e lamentable” da vía e reclaman unha actuación prioritaria para garantir a seguridade da veciñanza
Camariñas, 8 de outubro de 2026. O BNG de Camariñas reclama ao goberno municipal unha actuación urxente na rúa Grixa, na Ponte do Porto, debido ao seu “estado desastroso e lamentable”. A formación nacionalista denuncia a presenza de numerosas fochancas e tramos nos que o firme se atopa gravemente deteriorado, polo que pide ao executivo local que non demore máis a reparación da vía.
A rúa Grixa conecta o antigo cemiterio de San Pedro co novo camposanto da Ponte do Porto e dá acceso ás vivendas de varias familias. Ante esta situación, o BNG anunciou que preguntará ao goberno municipal se existe algún proxecto para a reforma integral da vía e, de ser así, reclamará que sexa presentado publicamente.
“A veciñanza que vive nese lugar ten dereito a ter un acceso ás súas casas en óptimas condicións e con seguridade”, afirmou o portavoz municipal do BNG de Camariñas, Xurxo Rodríguez Baña, quen advertiu ademais de que o mal estado da rúa xa provocou incidentes, incluídas caídas de persoas.
Rodríguez Baña visitou a zona este mércores, 7 de outubro, para comprobar de primeira man as condicións nas que se atopa a vía. O portavoz nacionalista considera que o goberno local debe priorizar actuacións que respondan ás necesidades cotiás da poboación.
“O goberno local ten que facer políticas centradas nas persoas que residen no noso municipio, pensando no día a día da veciñanza, para poder vivir nas condicións máis dignas posíbeis”, sinalou.
Desde o BNG critican tamén as prioridades da acción municipal e consideran que existen necesidades básicas que non poden quedar relegadas. Neste sentido, Rodríguez Baña afirmou que “non se pode centrar a acción de goberno en actuacións que convertan o noso concello nun parque temático, mentres logo hai rúas ou lugares abandonados que si son importantes para os habitantes de Camariñas”.
A formación nacionalista reclama así que o Concello actúe con “máxima prioridade” na rúa Grixa e dea unha resposta ás demandas da veciñanza, tanto para mellorar o acceso ás vivendas como para garantir unhas condicións adecuadas de seguridade para as persoas que utilizan diariamente esta vía.
