Costa da Morte, 28 de maio de 2026.– O Bloque Nacionalista Galego (BNG) instou á Xunta de Galiza a intervir ante a empresa XEAL para deter a destrución de postos de traballo e garantir unhas mellores condicións laborais e salariais para o persoal no novo convenio colectivo, actualmente pendente de aprobación.
A demanda foi trasladada polo deputado do BNG, Oscar Insua, durante unha pregunta parlamentaria formulada na Comisión de Industria, Enerxía, Comercio e Turismo. No transcurso da sesión, o secretario xeral de Industria e Desenvolvemento Enerxético, Nicolás Vázquez Iglesias, recoñeceu a perda de 50 empregos na compañía, aínda que o comité de empresa eleva a cifra por riba dos 90 postos desde o ano 2019.
Insua criticou a postura do Goberno galego ante esta situación e lembrou que unha sentenza do Tribunal Superior de Xustiza de Galicia establece a obriga de manter o emprego. “Non se pode perder nin o primeiro posto de traballo se se pretende cumprir a sentenza”, afirmou o parlamentario nacionalista, quen reclamou que se esixa á empresa o seu cumprimento.
O deputado tamén denunciou a actitude de XEAL nas negociacións do convenio colectivo, acusándoa de negarse a mellorar as condicións laborais e económicas do anterior acordo, xa caducado. Segundo destacou, esta situación prodúcese despois de que a empresa recibise máis de 30 millóns de euros en axudas públicas nos últimos cinco anos e rexistrase beneficios millonarios de forma continuada.
Ademais, Insua alertou da paralización da actividade na fábrica de Brens. “Non está en funcionamento ningún forno, o que está a xerar unha importante incerteza tanto entre os traballadores e traballadoras como no conxunto da comarca”, sinalou.
O representante do BNG cuestionou tamén que se estea avanzando na construción dunha planta de conversión de madeira en carbón vexetal, proxecto declarado estratéxico pola Xunta, mentres se produce o que cualificou como un progresivo desmantelamento da actividade industrial vinculada ás ferroaliaxes.
Segundo explicou, esta situación responde á estratexia da empresa de separar as actividades industriais das enerxéticas, unha práctica que o BNG vén denunciando desde hai anos. Por iso, reclamou á Xunta que faga cumprir as cláusulas concesionais e que medie de forma activa para facilitar un acordo xusto entre a dirección e o persoal.
Insua acusou ademais ao Executivo galego de permitir durante décadas o aproveitamento dos recursos naturais do país sen garantir un retorno social suficiente para os territorios afectados. “Os recursos naturais da Costa da Morte non poden converterse nun simple negocio especulativo desligado do interese social”, afirmou.
Para o deputado nacionalista, as concesións hidroeléctricas e os recursos públicos deben estar vinculados ao mantemento da actividade industrial, á creación de emprego de calidade e ao desenvolvemento económico da comarca. Neste sentido, insistiu en que os beneficios empresariais deben repercutir tamén no territorio e na sociedade que sostén a actividade da compañía.
O BNG conclúe reclamando á Xunta unha actuación decidida para garantir o futuro industrial de XEAL e a estabilidade laboral dos seus traballadores e traballadoras na Costa da Morte.