O Partido Popular de Sada expresa a súa preocupación polo estado actual de diferentes espazos públicos do municipio, nos que, segundo denuncia, a falta de mantemento e os actos vandálicos están a deteriorar a imaxe das rúas e das zonas comúns.
«A falta de mantemento e o vandalismo non deberían formar parte da nosa paisaxe, das nosas rúas», sinalan desde o PP de Sada, que reclama unha maior atención e coidado dos espazos públicos.
A formación considera que as rúas, parques e mobiliario urbano forman parte da imaxe de Sada e que o seu estado inflúe directamente na calidade de vida da veciñanza e na percepción que teñen do municipio tanto os residentes como as persoas que o visitan.
Desde o Partido Popular piden ao Goberno local que adopte as medidas necesarias para reforzar as tarefas de limpeza, conservación e reparación dos elementos deteriorados, así como para evitar que os actos vandálicos continúen afectando aos espazos públicos.
O PP de Sada insiste na necesidade de prestar atención ao día a día do municipio e lembra que manter Sada en boas condicións debe ser unha tarefa constante, non unha actuación puntual.
*Sada merece unhas rúas coidadas, limpas e en bo estado.*
