Enrique Astray lamenta a “deixadez” e o “esgotamento” do goberno local e denuncia a negativa do PP a debater a cuestión no pleno
Frades, 31 de xullo de 2026.– O PSdeG-PSOE de Frades critica a negativa do Concello a negociar co Estado a transferencia ao municipio da estrada nacional N-634 ao seu paso polo núcleo de Ponte Carreira, así como a decisión do goberno local do PP de non permitir o debate da cuestión no pleno municipal pola vía de urxencia.
O voceiro socialista local, Enrique Astray, explica que o seu grupo municipal presentou unha moción para abordar esta cuestión no pleno, pero que o goberno do PP de Frades rexeitou a súa urxencia, impedindo así que fose debatida na sesión.
Astray sinala que o Grupo Socialista Local mantivo recentemente un encontro con Pedro Blanco, delegado do Goberno en Galicia, no que, segundo explica, o representante do Estado amosou a súa disposición a abordar a transferencia da N-634 ao Concello no tramo correspondente a Ponte Carreira.
“En consecuencia, anunciamos que iamos presentar unha moción neste sentido, xa que a transferencia ten que ser acordada e aprobada no pleno”, explica o voceiro socialista.
Para Astray, a negativa a declarar a urxencia da moción “xa amosa a postura do PP de negarse a debater”, unha actitude que atribúe ao “nerviosismo e desasosego” do goberno local ante esta cuestión.
O socialista lembra tamén que o alcalde de Frades, Roberto Rey, manifestou que non tiña previsto retomar as negociacións co Estado nin coa Demarcación de Carreteras. “É un claro signo de deixadez institucional”, asegura Astray.
“O alcalde dixo que este asunto non era urxente, a pesar de tratarse dunha cuestión absolutamente prioritaria para Frades”, critica o voceiro do PSdeG. “Non queren debater porque saben que non teñen argumentos”, engade.
Astray considera que a postura do executivo municipal evidencia tamén o desgaste do goberno local. “Non deixa de ser un signo máis do cansancio e o esgotamento que presenta este goberno local, que sabe que vai perder a alcaldía de Frades e por iso xa se nega a falar co Estado”, afirma.
“Deixadez, altivismo, ou as dúas cousas á vez”, conclúe o voceiro socialista.