A participación da Agrupación de Protección Civil de Rianxo nunha ruta entre Malpica e a Praia de Niñóns, correspondente ao histórico percorrido do chamado “Camiño dos Faros”, volveu abrir o debate sobre quen está realmente detrás da organización destas actividades e baixo que autorizacións se están levando a cabo.
Segundo publicou nas súas redes sociais a propia agrupación, a actividade contou coa colaboración do Concello de Rianxo e desenvolveuse ao longo de arredor de 22 quilómetros pola Costa da Morte. Protección Civil asegura que realizou tarefas de apoio loxístico, prevención e acompañamento para garantir a seguridade das persoas participantes.
Porén, a polémica xorde porque a asociación “O Camiño dos Faros” anunciou publicamente no ano 2020 que deixaba de ser promotora da ruta e que tamén abandonaba calquera responsabilidade sobre a súa homologación, mantemento, sinalización ou organización.
Naquel comunicado, a entidade afirmaba literalmente:
“Queremos dejar claro que la asociación no es responsable del camino y, por lo tanto, no se hace cargo de nada de lo que pudiese suceder a los miles de senderistas que cada año hacen este recorrido”.
Tamén anunciaban que desistían da homologación como Ruta de Gran Recorrido e que deixaban de encargarse do mantemento do trazado.
Ante esta situación, diferentes voces pregúntanse agora quen organizou realmente esta nova actividade de sendeirismo e baixo que cobertura administrativa se desenvolveu. As dúbidas aumentan tendo en conta que actualmente é a Xunta de Galicia quen impulsa o chamado “Camiño do Litoral”, presentado como alternativa institucional e sucesora destas rutas costeiras.
Tamén se cuestiona que administracións locais prestaron apoio ou colaboración ao evento e se existiu coordinación coa planificación oficial promovida pola Xunta.
A isto súmanse críticas históricas cara á antiga asociación promotora, á que algúns participantes acusaban de manter dinámicas excluíntes e de apartar persoas con opinións diferentes dentro do movemento vinculado ao sendeirismo da Costa da Morte.
Por agora non transcendeu quen asumiu formalmente a responsabilidade organizativa da ruta nin se a actividade contou con autorizacións específicas dos distintos organismos implicados.
O debate continúa aberto entre quen defenden a recuperación popular do percorrido histórico e quen consideran que este tipo de actividades deberían desenvolverse unicamente dentro do marco institucional e oficial do novo proxecto autonómico do Camiño do Litoral.
Neste contexto, tamén se sinalou un episodio recente en Laxe no que un taxista local colocou no seu vehículo un cartel da asociación “Camiño dos Faros” e un boneco identificativo, a pesar de que a entidade non é promotora oficial das actividades actuais nin mantén responsabilidades organizativas sobre este tipo de rutas.