A formación denuncia vertidos recorrentes, malos olores e a colocación de contedores na propia ponte, xusto diante do punto polo que chega a auga ao cauce
BOIRO. – UCIN Boiro reclama ao Goberno local unha actuación inmediata ante os vertidos procedentes do pozo de bombeo de Loimar ao regato, unha situación que, segundo trasladan os veciños de Loimar e Ponte Beluso, se estaría producindo de maneira habitual e acompañada de fortes malos olores.
Segundo as denuncias veciñais recollidas pola formación, o pozo de bombeo verte cara ao regato con frecuencia, provocando un olor nauseabundo e deixando a auga cun aspecto moi escuro. As imaxes tomadas o pasado 25 de setembro permiten observar a chegada da auga ao cauce e a presenza de numerosas burbullas na superficie.
A situación, segundo UCIN, agrávase pola ubicación dos contedores instalados na zona. A formación critica que estes foran colocados sobre a propia ponte, xusto diante do punto polo que se produce a chegada da auga ao regato, dificultando a súa visibilidade desde a estrada e ocultando parcialmente o lugar do vertido.
Para UCIN Boiro, a colocación dos contedores non pode substituír a solución do problema ambiental. A formación considera necesario inspeccionar a instalación, determinar a natureza da auga que está chegando ao regato e adoptar as medidas necesarias para evitar que os vertidos continúen.
“Os veciños ven como o pozo de bombeo verte ao regato de maneira constante e soportan un olor nauseabundo. E, en lugar de solucionar o problema e colocar correctamente os contedores, decídese poñelos precisamente diante do punto do vertido. Isto require explicacións”, afirma Miguel Piqueras, coordinador de UCIN Boiro.
UCIN pide explicacións á concelleira de Medio Ambiente
A formación reclama á concelleira responsable de Medio Ambiente que explique que coñecemento tiña o Concello desta situación, que actuacións se realizaron ata o momento e que mecanismos de control existen para previr e detectar este tipo de incidencias.
UCIN considera necesario aclarar por que unha situación destas características pode producirse sen unha resposta preventiva e eficaz por parte dos responsables municipais.
Entre as medidas que reclama a formación figuran unha inspección do pozo de bombeo e do punto de vertido, a realización de análises das augas, a identificación da causa e da frecuencia das verteduras e a adopción das correspondentes medidas correctoras.
Tamén solicita a limpeza do cauce e da súa contorna, a revisión das instalacións e a posta en marcha dun plan de mantemento e control dos pozos e estacións de bombeo. UCIN pide, ademais, que os resultados das inspeccións sexan feitos públicos.
Piqueras considera que a situación evidencia posibles deficiencias nos mecanismos de control e mantemento:
“Se os veciños teñen que avisar para detectar o que está pasando, algo está fallando no control e mantemento. O medio ambiente de Boiro non pode depender das denuncias dos veciños.”
A formación reclama finalmente que se determine que está saíndo do pozo, desde cando se producen os vertidos, por que a auga chega ao regato e que medidas adoptará o Concello para evitar que a situación se repita.
“Os veciños merecen respostas e solucións, non que se coloque un contedor diante do problema”, conclúe Piqueras.
