Os equipos de emerxencias asistiron a dous tripulantes dun veleiro que encallou na noite do venres fronte á costa de Oia, a uns dous quilómetros ao sur do cabo Silleiro, na zona coñecida como Punta Centinela.
O aviso produciuse pasadas as once da noite, cando Salvamento Marítimo comunicou ao 112 Galicia o inicio das manobras de rescate. Ademais, solicitouse a colaboración de distintos recursos por terra, aínda que os dous ocupantes da embarcación xa estaban a recibir axuda dun percebeiro da zona.
Os tripulantes, de nacionalidade belga e francesa, recibiron asistencia sanitaria no lugar dos feitos, pero non precisaron ser trasladados a ningún centro hospitalario.
Segundo informaron os técnicos de Salvamento Marítimo, o veleiro presentaba unha vía de auga no casco, unha circunstancia que tamén puideron comprobar os axentes da Garda Civil desprazados ata a zona a bordo da embarcación Corvo Mariño.
Dada a complexidade do acceso por terra, inicialmente valorouse organizar un dispositivo de rescate por mar, no que estaba prevista a participación do Servizo de Gardacostas de Galicia. Porén, unha vez confirmado que os dous tripulantes xa se atopaban en terra e estaban en bo estado, descartouse esta intervención.
O incidente saldouse sen feridos de gravidade e sen necesidade de traslado hospitalario.
