O obradoiro coristanqués competirá en Bilbao os días 13 e 14 de setembro cun ‘molete’ elaborado con trigo autóctono galego con IXP e moído a pedra
A gastronomía galega volverá ter presenza nun dos grandes escaparates da panadería artesá a nivel nacional. A panadería Roiser, de Coristanco (A Coruña), conseguiu situarse entre as finalistas de ‘50 Panaderías TOP España 2026’, un dos principais recoñecementos do sector en España.
A final desta edición celebrarase en Bilbao os próximos 13 e 14 de setembro, nunha cita que reunirá algúns dos mellores obradoiros de panadería artesá do país. Entre eles estará este establecemento coristanqués, que acudirá ao certame como representante de Galicia.
Para a ocasión, Roiser apostará por un produto profundamente ligado á tradición panadeira galega: un ‘molete’ elaborado con fariña de trigo autóctono galego con Indicación Xeográfica Protexida (IXP). A fariña empregada na elaboración procede de Muiño do Quinto, onde é moída a pedra, mantendo así unha aposta pola calidade, os produtos de proximidade e os métodos tradicionais.
A proposta pretende poñer en valor non só o traballo artesanal do propio obradoiro, senón tamén a riqueza das materias primas galegas e o patrimonio asociado á elaboración tradicional do pan en Galicia.
A presenza de Roiser nesta final supón, ademais, un novo recoñecemento para a panadería artesá galega e para un sector que nos últimos anos está a gañar cada vez máis visibilidade dentro e fóra da comunidade.
Con este ‘molete’, o obradoiro de Coristanco levará a Bilbao unha pequena mostra da identidade gastronómica galega, combinando tradición, produto autóctono e elaboración artesanal nunha competición que reunirá o mellor da panadería artesá española.
