Ames, 14 de xuño de 2026.– UCIN Ames solicitou ao Concello de Ames e ás entidades responsables dos comedores escolares a adopción inmediata de medidas que permitan reducir as elevadas temperaturas que, segundo denuncian traballadores e representantes do servizo, se están rexistrando en varios centros educativos do municipio.
A formación asegura que esta situación afecta aos comedores da Escola Infantil do Milladoiro, o CEP Ventín, a Escola Infantil de Covas e a Escola Infantil da Igrexa, onde durante os últimos días se terían alcanzado temperaturas próximas ou incluso superiores aos 30 graos.
Desde UCIN Ames consideran que estas condicións resultan especialmente preocupantes ao afectar tanto a nenos e nenas de curta idade como aos profesionais que desenvolven a súa actividade diaria nestes espazos. A organización entende que a exposición prolongada a altas temperaturas pode provocar situacións de malestar e mesmo supoñer riscos para a saúde durante os episodios de calor intensa.
O coordinador de UCIN Ames, Juan Insua, afirmou que “os menores teñen dereito a desfrutar dunhas instalacións adecuadas e seguras durante a súa xornada escolar, mentres que os traballadores merecen desempeñar as súas funcións en condicións dignas e compatibles co seu benestar”.
Ante esta situación, a formación solicita a realización dunha avaliación urxente de todos os comedores afectados co obxectivo de coñecer o alcance real do problema. Así mesmo, reclama a posta en marcha inmediata de medidas que permitan reducir a temperatura nas instalacións e garantir unhas condicións axeitadas tanto para os usuarios como para o persoal.
UCIN Ames considera tamén necesario elaborar un plan de actuación a medio e longo prazo que evite que esta problemática volva repetirse en futuras tempadas estivais. Do mesmo xeito, pide que se manteña informadas ás familias e aos profesionais sobre as actuacións previstas e os prazos para a súa execución.
A formación municipal insiste en que a prioridade debe centrarse na protección da saúde e do benestar dos menores e do persoal que presta servizo nos centros educativos, apostando por solucións eficaces e definitivas para unha problemática que, segundo denuncian os afectados, vén repetíndose desde hai anos.
“Porque antes que políticos somos veciños”, concluíu Juan Insua, quen asegurou que UCIN Ames continuará vixiando a evolución desta situación e apoiará calquera iniciativa destinada a mellorar as condicións dos centros educativos do municipio.